Traha for di leu (remote) na Kòrsou: nómada digital
E programa atHomeinCuracao
Kòrsou a habri porta pa nómada digital i hende ku ke traha remote for di nan kas p'un kompania na un otro pais. E pèrmit ta duna bo chens di keda 6 luna, ku un opshon pa alarg'é pa un 6 luna mas, spesifikamente si bo por proba ku bo ta generá bo propio entrada for di un pais otro ku Kòrsou.
Kiko nan ta eksigí
Bo mester proba ku bo tin un kontrato di trabou for di afó of ku bo ta doño di bo propio kompania, huntu ku prueba di entrada sufisiente i stabil pa bo mantené bo mes sin bira un karga pa e sistema di gobièrnu lokal. Tambe bo mester un seguro di malesa ku ta kubri bo durante henter e estadia. E ta e manera di mas fásil pa eksperensiá e isla sin e komplikashon di pidi trabou lokalmente.