Kiko ta e profeshonnan ku por apliká pa un pèrmit di trabou na Kòrsou?
E regla general: e merkado lokal promé
Loke e Ministerio di Labor (SOAW) ta wak promé ta si tin hende lokal disponibel pa hasi e trabou. Si bo profeshon ta algu ku hopi yu di Kòrsou por hasi (manera trabou atministrativo básiko, bendedó di tienda, òf limpiesa), e chèns pa nan aprobá un pèrmit pa un estranhero ta masha chikitu. E dunadó di trabou mester proba ku e la buska lokalmente i no a haña ningun hende adekuá (lesa mas riba e proseso di e pèrmit di trabou pa e dunadó di trabou).
E profeshonnan ku tin mas chèns
E puestonan ku mas ta wòrdu aprobá ta esnan kaminda tin un skarsedat real na Kòrsou. Esaki ta inkluí: téknikonan spesialisá (frigorífiko, mekaniko di mashin pisá), profeshonalnan den sektor di IT, manehadónan ku eksperensia spesífiko, i sierto puestonan spesialisá den turismo òf konstrukshon avansá. Si bo tin sertifikadonan internashonal òf hopi aña di eksperensia komprobabel, bo tin un bentaha grandi.
Dokumentashon ta klave
Un di e fayonan di mas grandi ta apliká sin e diplomanan tradusí i apostiyá. Pa e SOAW evaluá bo kapasidat, tur bo papelnan mester ta na òrdu. Ademas, e dunadó di trabou mester demostrá pakiko eksaktamente e mester di bo abilidatnan spesífiko. Si e motivashon ta suak, e petishon ta kai na awa.